ဝါတွင်းကာလတွင် စစ်ကိုင်းမြို့ရှိ စေတီပုထိုးများအား ဘုရားစဉ်အလိုက် ဆွမ်းကြီးကပ်လှူသည့် ဘုရားပွဲတော်များကို ၀ါဆိုလပြည့်နေ့မှ သီတင်းကျွတ်လပြည့်နေ့အထိ ကျင်းပလေ့ရှိရာ စစ်ကိုင်းတောင်ရိုး ဆွမ်းဦးပုညရှင် စေတီတော်၌ ဇူလိုင်လ ၂၆ ရက်နေ့(‘ဒုတိယ၀ါဆိုလပြည့်နေ့) နံနက် အရုဏ်တက်ချိန်တွင် အရုဏ်ဆွမ်း ဆက်ကပ်လှူဒါန်းခြင်းဖြင့် စတင်ကျင်းပလျက်ရှိကြောင်း သိရသည်။

        စစ်ကိုင်းမြို့ရှိ ၀ါတွင်းဘုရားစဉ် ၁၄ ပွဲတွင် ဆွမ်းဦးပုညရှင် စေတီတော်၌ ပထမဆုံး ဆွမ်းဦးကပ်လှူကြခြင်းဖြစ်ပြီး ဆွမ်းဦးပုညရှင် စေတီတော်တွင် အရုဏ်တော်ဝတ်အသင်းများနှင့်အတူ အနယ်နယ်အရပ်ရပ်မှ လာရောက်၍ ဆွမ်းဦးကပ်လှူပူဇော်ကြ သော်လည်း လာရောက်ကပ်လှူ ပူဇော်သူများအနေဖြင့် မည်မျပင်လာစေကာ မူနတ်၊သိကြားများမှ ဆွမ်းဦးကပ်လှူပြီး ဖြစ်နေလေ့ရှိကြောင်း အစဉ်အဆက် ယုံကြည်ခဲ့ကြသည်။ စစ်ကိုင်းမြို့ ၀ါတွင်းဘုရားစဉ် ၁၄ ပွဲကို ပေါရာဏ လင်္ကာ မင်္ဂလာမှတ်တမ်းအရ 'ပုံ၊ တောင်၊ဇေ ၊ချမ်း၊ ဥ၊ နန်း၊ နံ၊ လေး၊ ပ၊ ထူ၊ ရှင်၊ ငါး၊ အောင်၊ ကောင်း'ဟူ၍ အစဉ်အတိုင်း ကျင်းပခြင်းဖြစ်ပြီး စစ်ကိုင်းမြို့၏ ဆွမ်းတော်ကြီး(အရုဏ်တော်) အသင်းများ စတင်ပေါ်ပေါက်လာသည့် နှစ်ကို ''ဥသြမြည်ဟည်းဆွမ်းတော်ကြီး'' ဟူသော နိယံမှန်စကားအရ မြန်မာသက္ကရာဇ် ၁၁၅၆ ခုနှစ် ဘိုးတော်ဘုရားလက်ထက် ကတည်းက ဖြစ်ပေါ်ခဲ့ကြောင်း သိရသည်။

        စစ်ကိုင်းမြို့နယ်အတွင်းရှိ ရွာထောင်ရပ်၊ ရွှေသမားရပ်၊ အိုးဘိုရပ်၊ မန်ကျည်းစင်၊ တင်းတိပ်၊ ဆွမ်းချက်၊ ပုဂံရပ်၊ စီတီး၊ ပဲကတိုး၊ လက်လှုပ်၊ ရေခါးစသော ကျေးရွာ၊ ရပ်ကွက်များရှိ ဆွမ်းတော်ကြီး အသင်းများမှာ "ကောင်း၊ ပု၊ ရှင်၊ မင်၊ မြ၊ ဖီ၊ မီ၊ ဗော၊ ချမ်း၊ နန်း၊ စေ၊ လဲ၊ ကောင်း"ဟူ၍ ဘုရားစဉ်များ ခွဲခြား၍ ကပ်လှူပူဇော်လေ့ရှိကြောင်း သိရှိရသည်။ယင်းသို့ ခွဲခြား၍ ဆွမ်းတော်ကြီးကပ်လှူခြင်းမှာ ဘုရားပုထိုးများတွင် နေရာထိုင်ခင်း အခက်အခဲမရှိစေရန် တောင်ဘီလူး ဆရာတော်ကြီးက ညှိနှိုင်းမှုပြုစေပြီး ဆွမ်းတော်ကြီး ကပ်လှူခဲ့ခြင်းဖြစ်ကြောင်း သမိုင်းမှတ်တမ်းများတွင် တွေ့ရှိရသည်။ "ဆွမ်းတော်ကြီး ကပ်လှူရာမှာ တောပွဲနဲ့မြို့ပွဲ ခွဲခြားပြီး ၀ါတွင်းကာလ ဥပုသ်နေ့တိုင်းမှာ ဘုရားစဉ်လင်္ကာအလိုက် ကပ်လှူခဲ့ကြတာ။ တောပွဲလို့ခေါ်တဲ့ ဘုရားစဉ်မှာ ရေခါးကျေးရွာမှာရှိတဲ့ ရွှေမြင်းမီဘုရား(မီ)၊နောက်ပြီး ဗောဓိကျိုက်ပတိုင်ဘုရား(ဗော)နဲ့ ပြူကံရွာအနီး ကလဲကျောင်းသိမ်း(လဲ)စတဲ့ ဘုရားစဉ်သုံးခုပဲ ကွဲလွဲပြီး ကျန်တဲ့ဘုရားတွေကတော့ နေ့ရက်လွှဲ ကပ်လှူတာပဲ ကွာ တာပါ"ဟု စစ်ကိုင်းမြို့ခံ လူကြီးတစ်ဦးက ပြောပြပါသည်။